ریلوے بجٹ ناندیڑ کیلئے مایوس کن ثابت ہوا

ناندیڑ:9؍جولائی ( نامہ نگار)نریندر مودی کی قیادت والی این ڈی اے حکومت کا پہلا ریلوے بجٹ پارلیمنٹ میں پیش ہوا ۔ ریلوے وزیر سدانند گوڑا نے ریلوے بجٹ پیش کرکے نئی گاڑیوں کا اعلان کیا ۔ اس بار کا ریلوے بجٹ بھی ناندیڑ کیلئے مایوس کن ثابت ہوا ہے ۔ نئے ریلوے بجٹ میں ناندیڑ بیکانیر ہفتہ واری ایکسپریس کا اعلان کیا گیا ۔ حالانکہ ناندیڑ کی عوام کو امید تھی کہ اس سال ناندیڑ سے کچھ نئی ٹرینیں شروع ہوں گی ۔ ناندیڑ ڈویژن کو ساؤتھ سینٹرل ریلوے سے ہٹاکر سینٹرل ریلوے میں شامل کرنے کا مطالبہ عرصہ سے کیا جارہاتھا ۔ اسی طرح ناندیڑ سے ممبئی کیلئے نئی ٹرین کابھی مطالبہ عرصہ سے کیا جارہا ہے ۔ مگر ان اہم مطالبات



کو بھی اس بار ریلوے بجٹ میں نظرانداز کردیاگیا ۔ مجموعی طورپر ریلوے بجٹ مہاراشٹر کیلئے بھی مایوس کن ثابت ہوا ہے کیونکہ مہاراشٹر کے حصہ میں کچھ خاص نہیں آیا ۔ مراٹھواڑہ کے اورنگ آباد سے چالیس گاؤں کے درمیان نئی ریلوے لائن بچھانے کے کام کا سروے کرنے کا بجٹ میں اعلان کیا گیا ہے ۔ مستقبل میں اورنگ آباد چالیس گاؤں براڈ گیج کام تکمیل پاتا ہے تو اس سے ایک نیا روٹ کھنڈوا ، نئی دہلی کیلئے دستیاب ہوگا ۔ کیونکہ فی الحال اورنگ آباد سے منماڑ ہوکر چالیس گاؤں جانا کافی طویل ہوتا ہے ۔ اگر اورنگ آباد چالیس گاؤں راست ریلوے لائین بچھائی جاتی ہے تو اس سے کئی گھنٹوں کا سفر بچ سکتا ہے ۔ اُسی طرح تلجا پور ، شولاپور ، نئی ریلوے لائین کے سروے کرنے کا بھی بجٹ میں اعلان کیا گیا ہے ۔